Hungariako Galdaragileen Konpartsa Primitiboa Parte Zaharreko kaleetatik ibiliko da larunbatean. Aurten, azken urteetan ez bezala, ibilbidea Santa Maria basilikan hasi beharrean, Trinitate plazan hasiko du, 21.45ean. Ez da aurtengo aldaketa bakarra: konpartsak, lehen aldiz, kanpamendua Santa Marian kokatuko du. Lekuak duen akustika ezin hobearen jakitun, 2017an konpartsak bere ibilbidea elizan hastea erabaki zuen. Aurtengoan pauso bat haratago joango da eta Sarriegi plazan kokatzen zuen kanpamendua Santa Marian jarriko du konpartsak, 22.15ean –Sarriegi plazan geldialdi bat egongo da-. Horrela, hiritarrei, ordutegiaren aldetik, momentu berezi horretaz gozatzea errazago egingo zaie.
Kanpamenduan gizon eta emakumeentzat konposatutako pieza guztiak abestuko dira eta konpartsaren erreginak, Joxean Estebanezek, gaurkotasunari buruzko ohiko diskurtso ironikoa irakurriko du. Iaz, “ideia berriez” beteriko zuzendaritza berri bat hautatu zuen konpartsak -Ramon Barandiaran eta Miriam Arruebarrena izendatu zituzten presidente eta presidenteorde, hurrenez hurren-, eta ideia horien artean zegoen ibilbidean aldaketak egitea.
Tradizioa eta modernitatea uztartzeko espirituari jarraiki, 250 kalderero eta zíngara Parte Zaharreko kaleetan zehar arituko dira zartagi, mailu eta danbolinekin. Ez dira faltako Irungo Erraldoi eta Buruhandi konpartsaren zingara eta galdaragile erraldoiak, Iparraldeko malabaristak eta musika banda. Ibilbidea 1.30ean bukatuko da Koruko Ama Birjinaren plazan, Ollagorra, Aizepe, Aitzaki eta Gaztelubide elkarteen aurrean.
Arribasek eta Arruebarrenak gogorarazi dute urtero Hungariako Kaldereroak aurrera joaten direla “1884ko otsailaren 2ko lehenengo desfilean hasi zen tradizioari helduz”. “Kaldereroak eta zingarak hemen jarraitzen dugu eta larunbat honetan berriz ere aterako gara Donostiako Parte Zaharreko kaleetatik Raimundo Sarriegik gure paisaiak zeharkatzen zituzten ijitoen tribuen oroimenean konposatutako melodiak abestuz eta interpretatuz”, esan dute. 2016 urteari dagokionez, Arribasek Donostiarako hain berezia den urtean Hungariako Kaldereroen Lehen Konpartsak ere bere ekarpena izango duela aurreratu du. Datorren astetan ezagutaraziko duten moduan “ahaztetik zenbait pertsona eta gai errekuperatzeko” hainbat omenaldiegingo dituzte.
Arribas eta Fernándezek adierazi dute urtez urte, parte-hartzaile kopurua gora doala. Ez hori bakarrik, gero eta gazte gehiago gehitzen ari dira konpartsara. Aurten, esaterako, 300 pertsona inguru aterako dira zartagin eta panderetekin. Horietatik 250 kalderero eta zingara inguru bilduko dira; besteak zaldunak, malabaristak, Irungo erraldoiak eta bandanko partaideak izango dira. “Konpartsa urtez urte handiagoa da. Gero eta gazte gehiago ateratzen dira gurekin, baita gero eta emakume gehiago ere. Oso garrantzitsua da hori, beti mistoak izan baikara eta iragana eta geroa, tradizioa eta berrikuntza uztartzen baititugu”, esan du Arribasek, Fernándezek gaurko gazteak etorkizuneko konpartsa sostengatuko dutenak izango direla gehitu du.
